Frumvarp stjórnlagaráðs afhent Alþingi

Stjórnlagaráð afhenti forseta Alþingis, Ástu Ragnheiði Jóhannesdóttur, frumvarp að nýrri stjórnarskrá í Iðnó í gær. Frumvarpið var samþykkt einróma á síðasta fundi ráðsins á miðvikudag. Leiðarstef stjórnlagaráðs voru þrjú: valddreifing, gegnsæi og ábyrgð.

Salvör Nordal, formaður stjórnlagaráðs, sagði ráðsliða afar stolta af verki sínu og því að tekist hefði að ljúka starfinu í góðri samvinnu hvert við annað og við þjóðina. „Við óskum þess að sem mestar og ítarlegastar umræður fari nú fram um frumvarpið á öllum sviðum samfélagsins.”

Ásta Ragnheiður þakkaði stjórnlagaráði fyrir vel unnin störf og sagðist vonast eftir því að í fyllingu tímans fengju Íslendingar stjórnarskrá sem þeir væru ekki aðeins sáttir við heldur stoltir af.

Alþingi tekur frumvarpið nú til umfjöllunar og viðbúið er að það taki nokkrum breytingum í meðferð þingsins. Í fréttatilkynningu segir að ráðsliðar séu einhuga um að veita beri landsmönnum færi á að greiða atkvæði um nýja stjórnar-skrá áður en Alþingi afgreiðir frumvarpið endanlega.

Spurð hvort stjórnlagaráð eða ráðsliðar myndu tjá sig um þær breytingar sem Alþingi kann að gera svaraði Salvör: „Við erum auðvitað hvert á okkar forsendum núna eftir að starfi stjórnlagaráðs lýkur og ég efa það ekki að einhverjir einstaklingar munu tjá sig um þær breytingar. En við lýsum okkur líka reiðubúin til að koma að verkinu aftur ef það hafa orðið miklar breytingar á okkar tillögum.“

Ari Teitsson, varaformaður stjórnlagaráðs, sagði frumvarpið góðan grunn að nýrri stjórnarskrá. Spurður hvort frumvarpið yrði að nýrri stjórnarskrá svaraði hann: „Ég held að við séum viss um að það sem við höfum nú lagt fyrir þjóðina verður notað. Við getum kannski ekki fullyrt að allar 114 greinarnar verði notaðar en ég er alveg sannfærður um að mikill meirihluti þeirra verður óbreyttur.“

Loks lögðu fulltrúar í stjórnlagaráði áherslu á að fólk missti ekki sjónar á stóru myndinni. Frumvarpið yrði eflaust skoðað og gagnrýnt en það þyldi slíka skoðun.

magnusl@frettabladid.is