Nilli gengur til liðs við Týndu kynslóðina

„Okkur finnst mjög skemmtilegt að fá Nilla til liðs við okkur," segir Björn Bragi Arnarsson, annar af stjórnendum sjónvarpsþáttarins Týnda kynslóðin, sem hefur göngu sína á Stöð 2 í ágúst.

Hinn skeleggi Níels Thibaud Girerd, best þekktur sem Nilli, hefur gengið til liðs við Björn Braga og Þórunni Antoníu og verður þeim til aðstoðar í nýju þáttunum. Nilli byrjaði með vefþætti fyrir vikuritið Monitor á Mbl.is í fyrra í kjölfar viðtals við hann og tónlistarmanninn Berndsen á Iceland Airwaves. „Hann verður eins konar hjálparkokkur og fer í sérverkefni," segir Björn og bætir við að hann líti á Nilla sem son. Það kemur ekki á óvart þar sem Björn Bragi var ritstjóri Monitors og átti hugmyndina að þáttum Nilla í samstarfi við vikuritið.

Nafn þáttanna, Týnda kynslóðin, er vísun í frægt lag Bjartmars Guðlaugssonar, en það býr meira að baki að sögn Björns. „Mér finnst þetta skemmtilegt nafn," segir hann. „Þátturinn á að höfða til allra kynslóða og ég held að allar kynslóðir líti á sig sem týndu kynslóðina. Ekki bara ungt fólk í dag. Þetta er svolítið opið og létt nafn sem mér fannst viðeigandi fyrir það sem við ætlum að gera."

Týnda kynslóðin verður, að sögn Björns Braga, skemmtiþáttur sem á að höfða til breiðs hóps. „Við verðum í opinni dagskrá á föstudagskvöldum og við viljum ná sem flestum að skjánum," segir hann. „Þetta verður blanda af spjallþætti og innslögum þar sem gestirnir taka virkan þátt í dagskrárgerðinni."- afb