Deilur tefja nýtt fangelsi

Ráðherrar í ríkisstjórn Íslands eru ekki sammála um hvaða leið beri að fara við byggingu nýs fangelsis. Mikill fjöldi brotamanna, sem hlotið hefur dóma, gengur laus þar sem ekki er pláss fyrir þá í fangelsum landsins.

Innanríkisráðherra, Ögmundur Jónasson, hefur sagt að hann vilji að framkvæmdin sé fjármögnuð af ríkinu. Það væri ódýrari kostur en ef einkaaðilar fjármögnuðu verkið. Jóhanna Sigurðardóttir forsætisráðherra segir hins vegar að bjóða eigi fjármögnunina út. Þá gætu lífeyrissjóðir eða einkaaðilar boðið í hana. Heimildir Fréttablaðsins herma að Steingrímur J. Sigfússon fjármálaráðherra sé sömu skoðunar, en ekki náðist í hann við vinnslu fréttarinnar.

„Ég vil fara þá leið sem flýtir þessu mest; að bjóða fjármögnunina út. Þá gætu lífeyrissjóðirnir fjármagnað verkið og ríkið síðan borgað árlega leigu. Þetta var gert nýverið varðandi fjölgun hjúkrunarrýma. Við gætum tekið ákvörðun strax á morgun ef það næðist samstaða um þessa fjármögnunarleið. Það er mikilvægt að menn séu ekki að halda í hugmyndir sem ekki eru raunhæfar," segir Jóhanna.

Þessum orðum hlýtur að vera beint að Ögmundi Jónassyni, en hann hefur talað fyrir því að framkvæmdin sé sett á fjárlög. Fyrir ríkisstjórn liggur tillaga þess efnis.

„Mér finnst það vera hið eina eðlilega í stöðunni, enda er sú leið í heildina mun ódýrari og þar af leiðandi hagkvæmari fyrir skattgreiðendur. Menn ætla að munurinn gæti verið á bilinu 300 til 500 milljónir króna," segir Ögmundur.

Jóhanna segir að sé ætlunin að fara þá leið verði að svara því hvar eigi að skera niður eða afla tekna á móti. Alls er um 2 milljarða króna framkvæmd að ræða.

„Það þýðir ekki að koma með inn á borðið tillögu um 2 milljarða útgjöld og skilja eftir á borði ríkisstjórnarinnar. Menn verða að segja hvar á að skera niður og hvar á að skattleggja í staðinn. Við búum við mikinn fjárlagahalla og höfum þurft að skera niður í velferðarkerfinu. Við munum þurfa að sýna mikið aðhald áfram í fjármálum," segir Jóhanna, en kostnaður við framkvæmdina mundi leggjast á þetta ár og næsta.

Ögmundur segir hins vegar ekki þörf á niðurskurði eða skattahækkunum. Hann vill að tekið sé lán fyrir framkvæmdinni og samið um frest á afborgunum. „Það er nákvæmlega það sama og mundi gerast ef einkaaðili tæki málið að sér. Hann mundi ekki greiða af sínum lánum fyrr en ríkið hæfi greiðslu á leigu." Eðlilegast sé að hefja framkvæmdina og fá fjárheimild á næsta ári.

Ögmundur segir að á endanum muni ríkissjóður borga hverja einustu krónu sem fer til verksins, hver sem umgjörðin verður. Því hljóti menn að horfa til þess að það geti munað frá 300 milljónum upp í hálfan milljarð á leiðunum. „Alþjóðagjaldeyrissjóðurinn var mjög áfjáður í að hafa ríkisbókhaldið í jafnvægi, en ef menn ætla út í þessa framkvæmd kemur þetta á einn stað niður fyrir raunverulegar greiðslur úr ríkissjóði.

Jóhanna og Ögmundur eru sammála um að framkvæmdin sé brýn og að enginn ágreiningur sé um það innan ríkisstjórnarinnar.

Jóhanna segir vel koma til greina að forsætisráðherra þurfi að höggva á hnútinn til að leysa málið.

kolbeinn@frettabladid.is

jss@frettabladid.is