Hættir loksins að klára appelsínusafa mömmu

„Það eru allir að tala um að ég sé brjálaður að flytja út frá mömmu fyrir þrítugt,“ segir Steinþór Helgi Arnsteinsson, umboðsmaður hljómsveitarinnar Hjaltalín og starfsmaður Senu.

Hinn 27 ára gamli Steinþór Helgi hefur kvatt móður sína, Eddu Hauksdóttur, eftir sambúð sem hefur varað frá fæðingu Steinþórs. Hann hefur unað sér vel í kjallara á heimili móður sinnar síðustu ár og játar að hann muni sakna hennar mikið. „Já og púðluhundanna, Dúdda og Dolla. Ég á eftir að sakna að kúra með þeim,“ segir Steinþór meyr.

Móðir Steinþórs býr á besta stað í miðbæ Reykjavíkur, sem var ein af ástæðunum fyrir því að dvöl hans á heimilinu var jafn löng og raun ber vitni. „Ég er mikill mömmustrákur,“ segir Steinþór. „Ég og mamma mín eigum í mjög skemmtilegu og heilbrigðu sambandi. Það var lítill hvati til að fara. Þetta var allt í svo fallegu og góðu ástandi.“

Steinþór hefur þó mátt þola mikinn þrýsting um að flytja út, ekki aðeins frá samfélaginu heldur einnig móður sinni, sem setti lagið Single Ladies með Beyoncé á Facebook þegar unginn hafði yfirgefið hreiðrið. „Það hefur verið þrýstingur á mér frá móður minni síðan ég kláraði menntaskóla. En ég held samt að hún sakni mín lúmskt, þrátt fyrir að hún hafi gefið yfirlýsingar um annað,“ segir Steinþór.

Steinþór kvíðir ekki piparsveinalífinu, enda segist hann vel í stakk búinn að sjá um sig sjálfur og þvertekur fyrir að hann ætli að fá hjálp frá móður sinni við að þvo af sér. „Ég er alinn upp af einstæðri móður sem hefur kennt mér margt í gegnum tíðina,“ segir hann. „Ég er fullfær húsmóðir og er búinn að fjárfesta í fallegri þvottavél, þannig að það verður ekkert vandamál. Ég fæ hana kannski til að bjóða mér í mat stöku sinnum.“

Og þótt ýmislegt breytist neitar því Steinþór að þetta umturni lífi hans. „Það sem breytist helst er að ég get loksins sett chili í matinn sem ég elda og fæ ekki samviskubit þegar ég drekk appelsínusafa. Mamma er alltaf að skamma mig fyrir að drekka appelsínusafann hennar,“ segir hann. „Mamma getur nú keypt sér lúxusappelsínusafa sem endist eitthvað.“atlifannar@frettabladid.is