Fjölskyldan útskrifast saman

„Við vorum eitthvað að hlæja að því fyrr í vetur að kannski mundum við útskrifast öll á sama tíma en vorum ekki viss um að það mundi takast,“ segir Eva Ýr Gunnlaugsdóttir, hjúkrunarfræðingur og master í mannauðsstjórnun, sem útskrifast laugardaginn 11. júní frá Háskóla Íslands. Dagurinn verður viðburðaríkur í fjölskyldunni þar sem móðir hennar og bróðir eru einnig að útskrifast úr sama skóla.

 

Móðir hennar, Jóhanna Lövdahl er að klára master í náms-og starfsráðgjöf og bróðir hennar, Sigfús Kristinn Gunnlaugsson, er að útskrifast sem læknir. Yngsti bróðir hennar, Einar, var síðan að útskrifast úr Menntaskólanum í Reykjavík í lok maí.

 

„Þetta er ekkert smá skemmtilegt að við náðum þessum áfanga öll saman,“ segir Eva Ýr og viðurkennir að próftímabilið hafi verið undarlegt í þetta skiptið enda ekki vanalegt að heil fjölskylda sé samferða í skólagöngunni með þessum hætti

 

„Mamma kallaði heimili sitt fyrir „studyhall“ þar sem öll borð voru undirlögð af tölvum og skólabókum. Ég átti það til að flýja til mömmu á próftímabilinu í vor en ég gat verið viss að andrúmsloftið þar væri vel lærdómshæft,“ segir Eva Ýr og undirstrikar að móðir sín hafi staðið sig sérstaklega vel í að hvetja systkinin áfram í lestrinum þrátt fyrir að vera sjálf með nefið í bókunum.

Eva Ýr segir að þau séu að skipuleggja sameiginlega útskriftarveislu. „Við ætlum að slá upp heljarinnar veislu hjá mömmu enda er þetta gott tilefni til að fagna saman.“ - áp