Sammála um varnir gegn olíumengun

Össur Skarphéðinsson utanríkisráðherra og Hillary Clinton starfssystir hans áttu langan fund í Washington í gær þar sem þau ræddu fjölmörg málefni, meðal annars tengt norður-heimskautinu, ástandinu í heimsmálum og tvíhliða samskiptum ríkjanna. Meðal annars óskaði Össur eftir því að Bandaríkin styddu viðleitni Íslands um að lagalega bindandi samningur væri gerður um varnir gegn olíumengun á Norðurslóð.

 

„Hún lýsti fyrir fullum stuðningi við það að Bandaríkin myndu styðja þá viðleitni; það væri líka í þeirra þágu,“ segir Össur. Tilefni fundarins var að Icelandair hefur hafið beint áætlunarflug til Washington, en Clinton lét þess getið fyrir fundinn að það væri „yndislegt fyrir okkur, sem elskum landið ykkar.“

 

Fundurinn varð mun lengri en til stóð en Össur sagði í samtali við Fréttablaðið eftir fundinn að hann hafi verið árangursríkur. „Við fórum yfir mjög mörg efni er vörðuðu samskipti Íslands og Bandaríkjanna, en ekki síður þá atburðarás sem hefur komið upp í heiminum á síðustu vikum og dögum.“

 

Fyrir utan fyrrnefndar mengunarvarnir sagði Össur að hann hafi tjáð Clinton stefnu íslenskra stjórnvalda að stofna til alþjóðlegrar miðstöðvar á sviði leitar og björgunar á Íslandi. „Hún tók ákaflega vel í þá hugmynd og ég lít svo á að þetta sé upphafið að viðræðum milli okkar og Bandaríkjanna um hvernig hægt sé að ná því fram, auðvitað í samvinnu við fleiri þjóðir.“

 

Loks sagði Össur að Clinton hafi tekið vel í tillögu hans um undirbúining formlegs tvíhliða samstarfs milli Íslands og Bandaríkjanna á sviði rannsókna tengdum norðurslóðum.

Auk þess ræddu ráðherrarnir um varnarsamstarf ríkjanna, ástandið í Líbíu, friðarferlið fyrir botni Miðjarðarhafs og hugsalegt samstarf á sviði jarðhita og ástandið á Íslandi í kjölfar hrunsins.

 

„Hillary vissi greinilega hver staðan er [...] og var áhugasöm um að heyra hvernig ég mæti reynsluna á samstarfinu við Alþjóðagjaldeyrissjóðinn. Ég sagði henni að menn hefðu veitt okkur miklu meira svigrúm til ákvarðanatöku en annars staðar og það hefði verið mjög farsælt og taldi að menn ættu að læra af þessari reynslu.“

thorgils@frettabladid.is, juliam@frettabladid.is