Sheen langar að skemmta Evrópu

Charlie Sheen hefur í hyggju að fara með einleikinn sinn á ferðalag um Evrópu og Asíu. Leikarinn lauk nýverið ferðlagi sínu um Bandaríkin og Kanada en sýningin My Violent Torpedo Of Truth/Death Is Not An Option hlaut misjafnar viðtökur. Sheen hefur verið mikið í fjölmiðlum að undanförnu eftir að hann sagði framleiðendum sjónvarpsþáttarins Two and Half Men stríð á hendur og var í kjölfarið rekinn. Síðan þá hefur líf leikarans umturnast, hann fer mikinn á netinu og áðurnefnd sýning þykir nokkuð sérstök.

Og Charlie hefur þá bjargföstu trú að bæði Asíubúar og Evrópumenn muni elska My Violent Torpedo of Truth. „Þetta yrði kannski meira í ætt við notalega kvöldstund með Charlie Sheen. Ég held að Evrópubúar muni sýna mér meiri skilning, þeir eru miklu þolinmóðari,“ segir Sheen í samtali við ástralska útvarpsstöð en þar er leikarinn staddur nú. Sheen hefur þegar tilkynnt að allur ágóði sýninganna renni beint til fórnarlamba hvirfilbyljanna sem riðu yfir Bandaríkin nýverið.