Verða að haga sér vel

Raunveruleikaþættirnir Jersey Shore hafa slegið rækilega í gegn vestan hafs og nú er áætlað að færa út kvíarnar. Snookie, J-WOW og hinar stjörnurnar munu halda til Flórens á Ítalíu þar sem nýjasta þáttaröðin verður tekin upp.

Borgarstjóri Flórens hefur samþykkt að taka á móti stjörnunum og tökuliði þeirra en aðeins ef þau framfylgja nokkrum reglum. Matteo Renzi vill ekki að stjörnurnar verði myndaðar við drykkju á skemmtistöðum eða á almannafæri og passa verður upp á að kynna Flórens sem menningarborg og ekki skemmtanaborg. Það verður spennandi að sjá hvort þetta gangi eftir enda eru Snookie og félagar þekkt fyrir margt annað en háttvísi.