Fékk lopapeysu upp á svið frá aldraðri grúppíu

„Viðtökurnar hafa verið yndislegar. Það er rosalega gaman að syngja fyrir eldra fólk,“ segir tónlistarmaðurinn Svavar Knútur. Svavar Knútur gaf út plötuna Amma í fyrra. Á henni flytur hann gamlar perlur sem hann hefur tekið ástfóstri við, en platan er tileinkuð ömmum hans. Svavar hefur fylgt plötunni eftir í félagsmiðstöðvum eldri borgara víða um land og verið vel tekið. „Það er svo mikil æskudýrkun í samfélaginu,“ segir Svavar ákveðinn. „Fólk hangir á að eina fólkið sem eigi að fá tónlist og menningu sé ungt fólk. Það eru hópar af eldri borgurum sem vilja fá tónlist. Það er gaman að teygja sig til þessa hóps sem hefur verið vanræktur af yngri kynslóðinni.“

Svavar segist fá mikið út úr því að spila fyrir eldri borgara og játar að hafa fengið sérstakar gjafir frá grúppíunum. „Það sem er skemmtilegt þegar maður er farinn að njóta ömmuhylli, þá fyllast þær ömmubarnaást,“ segir hann. „Ég hef verið að grínast með að Friðrik Dór fái örugglega G-strengi upp á svið, en ég fæ lopapeysur. Þetta er heill heimur sem ég er að uppgötva – alveg æðislegt fólk, opið og skemmtilegt. Alltaf til í að taka vel á móti manni. Ég held að það hafi allir rosalega gott af því að umgangast eldri borgara.“

Spurður hvort gömlu karlarnir séu afbrýðisamir og gruni hann jafnvel um að einoka kvenhyllina segist Svavar aðeins einu sinni hafa lent í því að hindra gamlan mann. „Það var svolítið viðkvæmt, en endaði vel. Allir voru kátir á eftir,“ segir Svavar léttur. „Annars eru karlarnir hressir. Þeir eru alltaf aðeins færri, enda deyja þeir fyrr. Konurnar eru margar miðað við karlana, þannig að þeir hafa nóg fyrir sig – eru eins og hanar í hænsnakofa.“

Svavar segir að samfélagið sé gegnumsýrt af fordómum gagnvart eldra fólki, en hann segir að ótti fólks við að eldast sé ástæðulaus. „Þetta fólk er ekki síður með lifandi og skemmtilegt tilfinningalíf og er gratt. Það er allt í gangi!“ Svavar áréttar að hann sé ekki hættur að spila fyrir yngra fólk, heldur vilji hann einfaldlega ná til fjölbreyttra hópa. „Eldri borgarar eru hluti af fólkinu sem ég vil syngja fyrir,“ segir hann. „Maður á ekki að vanrækja þá. Það er ótrúlega gaman að mæta til þeirra og syngja.“

Svavar Knútur kemur fram á Akranesi á mánudag og er svo á leiðinni í tónleikaferðalag til Þýskalands og Frakklands.

atlifannar@frettabladid.is