Vill í alla hommaklúbba Bandaríkjanna

Söngkonan Hera Björk Þórhallsdóttir er í forsíðuviðtali nýjasta tölublaðs tímaritsins Out on the Town. Tímaritið stærir sig að því að vera það heitasta í Suðurríkjum Bandaríkjanna sem er sérstaklega ætlað hommum og lesbíum.

„Ég vona að við heyrum Je ne sais quoi í öllum homma- og lesbíuklúbbum Bandaríkjanna. Það er eitthvað sérstakt við lagið sem þið kunnið að meta,“ segir Hera meðal annars í viðtalinu. Hún talar einnig um hinn norska Jarl Haugedal, en þau kynntust á Eurovision-keppninni í Osló á síðasta ári. Hann á hótel í New Jersey í Bandaríkjunum og hefur unnið að því að koma Heru á framfæri þar í landi. „Hann bauð mér út og síðan þá höfum við unnið að því að koma mér og tónlistinni minn á framfæri.“ Mike Halterman, ritstjóri Out on the Town, segir meðal annars í leiðara sínum að Hera hafi slegið í gegn í Evrópu og vilji brenna upp dansgólfin í Bandaríkjunum. Þá hvetur hann fólk til að biðja plötusnúða um að spila smell Heru, Je ne sais quoi.

Hera talar einnig um tónlistina sem hún er að hlusta á þessa dagana og telur upp George Michael, Joni Mitchell, Freddie Mercury og Lady Gaga. Hún áréttar að hún ætlar ekki að fara í sömu átt og sú síðastnefnda, en hún er afar vinsæl á meðal homma og lesbía. „Það hefur verið gert áður og það er nóg af góðum hlutum í gangi,“ segir Hera. „Þið fáið bara mig.“- afb