Gremja í The Strokes

Julian Casablancas, söngvari The Strokes, segir gremju hafa verið í hljómsveitinni við upptökur á nýju plötunni, Angles.

Casablancas er í viðtali í nýjasta tölublaði breska tónlistartímaritsins NME. Þegar upptökur á plötunni stóðu yfir lýsti hann því yfir að hann ætlaði ekki að skipta sér af upptökunum, heldur taka upp sönginn og leyfa hinum að taka upp í friði. NME spurði hann út í þessi ummæli.

„Ég vildi bíða þangað til þeir voru búnir að gera sitt svo ég gæti gert mitt," sagði Casablancas um málið. „Þegar hljómsveitin fær neikvæða athygli virðist ástæðan alltaf vera að ég sé að skipa öllum fyrir, en þannig er það ekki. Ég vil bara eiga skapandi, uppbyggilegar og skemmtilegar rökræður um tónlistina. Við vorum ekki að ná því og þess vegna var gremja í hljómsveitinni."

Strákarnir í The Strokes virðast hafa náð sáttum því platan var kláruð heima hjá gítarleikaranum Albert Hammond Jr. og kemur út 21. mars næstkomandi.

Hér fyrir ofan má hlusta á fyrstu smáskífuna af nýju plötunni, Under Cover of Darkness, en hljómsveitin hefur gert lagið aðgengilegt á heimasíðu sinni, YouTube og víðar.