Topp fimm buxurnar í fataskápnum

Ingibjörg Rósa Harðardóttir hefur starfað í fatabransanum síðan hún var 17 ára gömul en nú er hún einn af rekstrarstjórum NTC verslunarkeðjunnar.

Inga Rósa, eins og hún er kölluð, segist vera algjör buxnastelpa og gengur sjaldan í kjólum eða pilsum. Inga Rósa deildi með Föstudegi Fréttablaðsins hverjar eru hennar fimm uppáhaldsbuxur í fataskápnum.



1. Nýjustu kaupin

„Diesel-gallabuxur sem ég féll fyrir nýlega og sé ekki eftir því. Hef varla farið úr þeim. Þær eru bæði háar í mittið og úr þægilegu teygjuefni. Passa við allt, háa hæla jafnt og strigaskó."







2. Háar í mittið

„5 Unit-buxur sem ég keypti í Gallerí 17 í september. Þessar minna svolítið á aðhaldsbuxur því þær eru svo háar í mittið, sem skiptir mig miklu máli. Maður á aldrei nóg af svörtum buxum í fataskápnum."

3. Elstu og bestu

„Þessar keypti ég í H&M á Ítalíu árið 2002 og eru mínar uppáhalds. Stærsta hrósið fyrir buxurnar er að ég passa enn þá í þær, níu árum og tveimur börnum seinna."

4. Víðar og þægilegar

„Köflóttar buxur frá Ichi sem eru keyptar í Gallerí 17. Dragtarbuxur með síðu klofi sem ég nota helst við ökklastígvél og þröngan bol eða skyrtu."

5. Ómissandi í fataskápinn

„Æðisleg útsölukaup sem ég rambaði inn á í EVU fyrir fjórum árum. Teknar fram hvern einasta vetur og tel ég það algjörlega nauðsynlegt að eiga leðurbuxur í flottu sniði. Þær eru mjög mjúkar úr hanskaleðri og með rassvösum úr efni sem setja skemmtilegan svip á buxurnar."