Skilnaðarfárið heldur áfram

Mánuðina fyrir jól barst fjöldi frétta af hjónaskilnuðum ríka og fræga fólksins í Hollywood-hæðum. Ekkert lát virðist vera þar á, í vikunni bárust fregnir af því að fleiri fræg pör hafi ákveðið að halda hvort í sína áttina.

Breski leikarinn Jude Law skildi við kærustu sína, Siennu Miller, í byrjun vikunnar og mun þetta vera í þriðja sinn sem parið hættir saman. Law og Miller kynntust við tökur á kvikmyndinni Alfie árið 2003 og voru saman allt til ársins 2006 þegar þau hættu saman eftir að upp komst um framhjáhald Laws. Parið endurnýjaði kynni sín haustið 2009 en tilkynntu svo núna í vikunni að þau höfðu ákveðið að slíta sambandi sínu.

Söngkonan Ashlee Simpson og eiginmaður hennar, tónlistarmaðurinn Peter Wentz, sóttu einnig um skilnað í vikunni. Parið hefur verið saman frá árinu 2007 og eiga soninn Bronx. Fréttirnar komu mörgum á óvart enda virtist hjónaband þeirra nokkuð traust.