Mikil aðsókn í karókí

Það var nóg um að vera í miðborg Reykjavíkur um helgina í tengslum við tónlistarhátíðina Iceland Airwaves. Þannig bauðst gestum og gangandi á Kex hostel að fara í karókí en hægt er að fylgjast með því sem fram fór á vefsíðunni Live Project.

Kemur í ljós að fjölmörg þekkt andlit spreyttu sig í karókí með misgóðum árangri. Meðal þeirra sem tóku lagið voru Berndsen og Þórunn Antonía sem sungu lagið Toxic með Britney Spears.

Strákarnir í Agent Fresco spreyttu sig á laginu Everybody með Backstreet Boys og rapparinn Emmsjé Gauti sýndi áður óþekkta tilburði þegar hann söng lag Celine Dion, My Heart Will Go On. Þá heimsótti fréttastofa Stöðvar 2 og Vísis Kexið og söng einum rómi lagið Don't Stop Believing með Journey.