Segir íslensku böndin líkjast öðrum

Fjallað er um tónlistarhátíðina Iceland Airwaves, sem lauk um síðustu helgi, í bandaríska tímaritinu New York Magazine og hinu breska Clash Music.

Hið fyrrnefnda segir hljómsveitina Samaris hafa spilað mun betur en búast hafi mátt við miðað við ungan aldur meðlimanna. Líkir blaðamaðurinn sveitinni við The XX og Tricky. Hann segir Lay Low vera kántríútgáfu af skosku hljómsveitinni Camera Obscura. „Það var of mikið af póst-rokkurum í anda Mogwai og Sigur Rósar að spila á hátíðinni og hin kraftmikla Lára Rúnarsdóttir minnir á Gwen Stefani,“ skrifar blaðamaðurinn einnig og bætir við að lag Of Monsters and Men, Little Talks, sé ótrúlega grípandi. Hljómsveitin minni á Edward Sharpe and the Magnetic Zeros, Mumford & Sons og Arcade Fire.

Hann segist ekki hafa fundið hina nýju Björk á hátíðinni, því íslensku hljómsveitirnar hafi líkst um of öðrum erlendum listamönnum. Tónleikar Bjarkar, Biophilia, hafi aftur á móti verið mjög vel heppnaðir og þar hafi ef til vill verið hin nýja Björk á ferðinni eftir allt saman.

Blaðamaður Clash Music skrifar að þrátt fyrir að flestir evrópskir tónlistaráhugamenn þekki hvorki haus né sporð á Ham, Vicky, Retro Stefson eða Snorra Helgasyni hafi verið augljóst að flest hafi þau staðist samanburð við fræg nöfn á borð við Yoko Ono, Beach House, Tune-Yards og Owen Palette.