Það er víst metflótti frá Íslandi

Undanfarna hálfa öld hafa aldrei fleiri Íslendingar - né stærra hlutfall þjóðarinnar - flutt til útlanda, umfram aðflutta, heldur en eftir hrun. Þetta sýna útreikningar fréttastofu. Forsætisráðherra fullyrti í gær að það væri stórlega ofsagt að hér væri mikill brottflutningur fólks.

Jóhanna Sigurðardóttir, forsætisráðherra sagði í viðtali á RÚV í gær að fólksflutningar í ár væru ekkert meiri en í venjulegu árferði. „Þannig að ég held að þetta sé nú stórlega ofsagt að hér sé mikill brottflutningur," bætti forsætisráðherrann svo við í gær í tilefni af umræðu sem spratt meðal annars upp af ítarlegri úttekt um landflóttann í nýjasta hefti Frjálsrar verslunar.

Nokkuð hefur verið togast á um hvort landflóttinn eftir hrun er mikill eða ekki. Til að kanna hvað væri hæft í málinu rýndi fréttastofa í tölur Hagstofunnar í dag. Línurit (sem sjá má í innslaginu hér fyrir ofan) sýnir sveiflurnar í straumnum frá landinu síðustu 50 árin, topparnir eru þau ár þegar flestir Íslendingar fluttu frá landinu, umfram þá sem fluttu heim.

Sex tímabil skera sig úr. Til að afmarka landflóttaskeiðin miðaði fréttastofa við þau ár þegar yfir þúsund fleiri hefðu farið en komið. Eins og súlurnar sýna fluttu hátt á þriðja þúsund íslenskra ríkisborgara burt umfram aðflutta, á kreppuárunum 69-70 - og aftur 95-96.

Hallinn er hins vegar mestur eftir hrun, yfir fimmþúsund og fimmhundruð. Rétt er að taka fram að hæsta súlan sýnir tæplega þriggja ára skeið, en það er líka eina tímabilið þar sem brottfluttir umfram aðflutta eru yfir 1000 manns þrjú ár í röð.

Þegar skoðað er hversu mikil blóðtakan var í hlutfalli við þjóðina, því Íslendingum hefurn jú fjölgað á síðustu fimmtíu árum - má sjá að aldrei hefur hærra hlutfall þjóðarinnar yfirgefið skerið en eftir hrun - í bili, eða til langframa.