Flottasta giggið á Airwaves haldið í 90 fermetra íbúð

„Fólk á ekki að hugsa um þetta sem tónleika heldur sem partí,“ segir Steinþór Helgi Arnsteinsson.

Steinþór leigir íbúð við Ingólfsstræti 8 ásamt Aroni Steini Ásbjarnarsyni og Atla Bollasyni, fyrrum hljómborðsleikara Sprengjuhallarinnar. Þeir hafa ákveðið að taka Airwaves-tónlistarhátíðina með miklu trompi og bjóða upp á metnaðarfulla Off venue-dagskrá á heimili sínu um næstu helgi. „Við strákarnir elskum að hafa gaman saman og þetta lá einhvern veginn beint við. Við þekkjum mjög marga í tónlistarheiminum og dagskráin fylltist fljótt. Þetta var snjóbolti sem breyttist í snjóflóð,“ segir Steinþór.

Steinþór segir að öll húsgögn í stofunni verði sett til hliðar og í staðinn komi hljóðkerfi. Hann segir að íbúðin rúmi kannski um hundrað manns en 20-30 ættu að komast fyrir í stofunni. „Fólk getur tjillað inni í herberginu mínu og talað um skrýtna gaurinn í röðinni frá kvöldinu áður. Þetta á bara að vera gott partí, eini munurinn er að í staðinn fyrir að það komi tónlist frá græjunum þá kemur hún frá lævbandi inni í stofu.“

Steinþór segir að tvö af stærstu nöfnum hátíðarinnar spili á heimili þeirra, Owen Pallett og Glasser, auk þess sem þekkt íslensk nöfn á borð við Berndsen troða upp. „Við erum ekkert að stressa okkur á þessu, ef rafmagnið slær út þá heldur partíið bara áfram,“ segir hann. Dagskrá verður á Ingólfsstræti 8 föstudag og laugardag frá klukkan 15 til 20.30. „Við vorum að pæla í því að láta dagskrá hefjast að nýju eftir fjögur á nóttunni en ákváðum að hlífa nágrönnunum við því.“

hdm@frettabladid.is