Eurowoman og Fricke á Airwaves

Blaðamenn frá þekktum erlendum fjölmiðlum verða gestir á tónlistarhátíðinni Iceland Airwaves sem hefst um miðjan október. David Fricke frá bandaríska tónlistartímaritinu Rolling Stone kemur til landsins, en nokkur ár eru liðin síðan hann mætti síðast á Airwaves. Hann hefur iðulega farið lofsamlegum orðum um íslenska tónlist.

Einnig kemur hingað Kieron Tyler frá breska tímaritinu Mojo. „Hann er einn af aðalblaðamönnum tímaritsins. Hann er mjög mikið í því að uppgötva hljómsveitir,“ segir Kamilla Ingibergsdóttir hjá Airwaves. Spurð hvaða íslensku bönd kappar á borð við Tyler og Fricek ætli að sjá segir hún: „Það segir þeim enginn hvert þeir eiga að fara. Þeir vilja ráða því svolítið sjálfir. Þeir vilja finna allt það sem er ferskast og eru mjög góðir í því.“

Hingað kemur einnig fulltrúi frá tískutímaritinu Eurowoman. „Blaðið ætlar að fjalla um hátíðina og Reykjavík og að sjálfsögðu um tískuna,“ segir Kamilla.

Meðal annarra fjölmiðla sem senda blaðamenn á Airwaves verða Clash Magazine, Stereogum, Filter Magazine, dönsku blöðin Politiken og Gaffa, La Blogotéque frá Frakklandi, BBC í Skotlandi og danska og sænska ríkisútvarpið. Einnig koma hingað bókarar frá Hróarskelduhátíðinni í Danmörku, bransahátíðinni Eurosonic í Hollandi og frá nokkrum stórum tónlistarhátíðum í Kanada. - fb