Pantera kemur aldrei saman aftur

Vinnie Paul, trommari hinnar sálugu þungarokkshljómsveitar Pantera, segir endurkomu hljómsveitarinnar ekki á dagskránni. Dimebag Darrell, gítarleikari Pantera, var skotinn til bana á sviði í desember árið 2004. Paul segir eftirlifandi meðlimi hljómsveitarinnar ekki ætla að koma saman á ný.

„Að stinga upp á því að við komum saman er vanvirðing að mínu mati," sagði Paul í viðtali við rússnesku vefsíðuna Darkside. Hann bætti við að hljómsveitin myndi aldrei spila saman án Dimebags.

„Dime var svo stór hluti af því sem við vorum að gera. Það væri fáránlegt að svo mikið sem hugleiða endurkomu. Hann skildi eftir sig ótrúlega arfleifð. Hún er falleg og einstök og ég ætla að halda henni þannig."

Meðlimir Pantera stóðu í opinberum rifrildum þegar Dimebag var skotinn. Söngvarinn Phil Anselmo deildi þá við bræðurna Dimebag og Vinnie Paul og höfðu þeir ekki sæst áður en Dimebag var skotinn.