Leita að ofur­fyrirsætu

Leitin að næstu Elite-stúlku landsins hefst á laugardag en þá munu aðstandendur Elite-skrifstofunnar taka á móti áhugasömum stúlkum á skrifstofu sinni við Klapparstíg 25-27 milli klukkan 14.00 og 17.00. „Það eru allar stúlkur á aldrinum 15 til 20 ára velkomnar, þær þurfa þó að vera yfir 170 sentimetrar á hæð,“ segir Ingibjörg Finnbogadóttir, framkvæmdastjóri Elite-skrifstofunnar á Íslandi. Engin íslensk stúlka hefur áður hreppt eitt af þremur efstu sætunum í keppninni Elite Model of the World en Ingibjörg vonar að nú verði breyting þar á. „Við ætlum að breyta því enda er hér fjöldinn allur af gull­fallegum stúlkum.“ Tökulið mun fylgja þátttakendum keppninnar eftir á meðan á undirbúningi stendur og verða þættirnir sýndir á Stöð 2. - sm