Afríkumyndir Páls á uppboði

25 ljósmyndir Páls Stefánssonar frá Afríku verða boðnar upp í dag til styrktar Barnaheill - Save the Children á Íslandi. Allur ágóði af sölu myndanna rennur til menntunarverkefnis samtakanna í Pader-héraði í Norður-Úganda.

Myndirnar eru afrakstur heimsókna Páls til Afríku á síðustu árum. Myndirnar voru sýndar í aðalstöðvum Sameinuðu þjóðanna í New York árið 2008 og birtust að auki í bókinni, Áfram Afríka.

Lágmarksverð á ljósmyndunum er 70 þúsund krónur. Gerður Kristný, skáld og rithöfundur, og Páll Stefánsson ljósmyndari stýra uppboðinu sem fer fram frá klukkan 16.30 til 18.30. Uppboðið er þögult, sem merkir að áhugasamir geta skoðað myndir á heimasíðu Barnaheilla og sent kauptilboð á netfangið barnaheill@barnaheill.is.