Dávaldurinn á hvíta tjaldið á næsta ári

Kvikmynd byggð á einni vinsælustu skáldsögu síðasta árs, Dávaldinum, er í undirbúningi. Leikstjóri verður Svíinn Lasse Hallström sem á að baki myndir á borð við Mit liv som hund, What"s Eating Gilbert Grape og Chocolat.

Hallström er virtur leikstjóri sem var tilnefndur til Óskarsverðlaunanna fyrir Mit liv som hund, sem kom út 1985. Síðan þá hefur hann haft í nógu að snúast í Hollywood og leikstýrt hverri myndinni á fætur annarri.

Tökur á Dávaldinum eru fyrirhugaðar á þessu ári og því næsta og frumsýning er áætluð haustið 2012. Það eru fyrirtækin Svensk Filmindustri og Sonet Film sem framleiða myndina.

Dávaldurinn er ein mest selda bók síðari ára í Svíþjóð. Höfundurinn heitir Lars Kepler, sem er dulnefni hjónanna Alexöndru og Alexanders Ahndoril. Þau höfðu áður gefið út bækur hvort í sínu lagi við þónokkrar vinsældir þangað til heimsfrægðin bankaði á dyrnar með Dávaldinum.

Bókin segir frá Joona Linna, finnskættuðum rannsóknarlögreglumanni hjá ríkislögreglunni í Svíþjóð. Hann tekur að sér að rannsaka ógeðfellt morð á fjölskyldu í smábæ og fær lækninn og dávaldinn fyrrverandi, Erik Maria Bark, til að dáleiða eina fórnarlambið sem lifði árásina af.