Aðdáendur Justins Bieber herja á fjölskyldu

Enn á ný komast brjálaðir aðdáendur Justins Bieber í fréttirnar. Nú töldu þeir sig hafa fundið símanúmer söngvarans, en það reyndist vera númer hjá venjulegri fjölskyldu í New York.

Síminn hjá fjölskyldu í New York í Bandaríkjunum hefur ekki stoppað síðan heimasíminn hjá henni birtist á aðdáendasíðu kanadíska söngvarans Justins Bieber. Númerið var eignað Bieber og aðdáendurnir létu ekki segja sér það tvisvar og hringdu viðstöðulaust í fjölskylduna saklausu.

Einn af meðlimum fjölskyldunnar, hinn 17 ára gamli Eric McGriff, sagði í samtali við fréttasíðuna TMZ í gær að líf fjölskyldunnar hefði umturnast eftir að númerið birtist á vefsíðunni í síðustu viku. Hann segir símann ekki hafa stoppað þangað til fjölskyldan greip til þess örþrifaráðs að skipta um símanúmer.

„Þetta hefði kannski verið skemmtilegt ef númerið okkar hefði birst á vefsíðu söngvara sem við kunnum að meta," sagði McGriff. „En við þolum ekki Justin Bieber. Þannig að símtöl frá aðdáendum hans eru ekki það besta sem gat komið fyrir okkur."

Ekki er vitað hvað vakti fyrir þeim sem birti númerið á vefsíðunni, en talið er að um einhvers konar misskilning sé að ræða þar sem enginn hefur stigið fram og viðurkennt að um hrekk sé að ræða.

Aðdáendahópur Justins Bieber samanstendur að mestu af táningsstúlkum. Þær hörðustu kalla ekki allt ömmu sína og hafa reglulega komist í fréttir þegar þær hafa farið yfir strikið. Sem dæmi um það má nefna að þegar myndir af Justin Bieber og ofurskutlunni Kim Kard­ashian birtust á vefmiðlum fékk ungfrúin líflátshótanir, þrátt fyrir að hún hafi lýst því yfir að hann væri allt of ungur fyrir sig. Þá hafa aðdáendurnir verið duglegir við að tjá sig um samband Biebers og táningsstjörnunnar Selenu Gomez og jafnvel hótað að myrða hana fari hún ekki vel með hann.