Mynd um Milli Vanilli í bígerð

Þýski kvikmyndagerðarmaðurinn Florian Gallenburg hefur í hyggju að gera kvikmynd um popp­dúettinn Milli Vanilli. Þeir sem voru uppá sitt besta á hinum illræmda níunda áratug muna eflaust eftir hinum félögunum í Milli Vanilli sem sópuðu til sín verðlaunum og viðurkenningum á þeim tíma, hlutu meðal annars Grammy-verðlaun.

Þeir voru hins vegar afhjúpaðir illilega í fjölmiðlum þegar upp komst að þeir voru einungis að hreyfa varirnar við söng annarra. Þetta fékk ákaflega mikið á þá, eins og gefur að skilja, og hrakti meðal annars Rob Pilatus inní harðan heim eiturlyfjaneyslu.

Þeir reyndu meðal annars að endurvekja frægðarljómann árið 1996 með fremur misheppnuðum árangri og Pilatus lést aðeins tveimur árum seinna eftir of stóran skammt af lyfseðilsskyldum lyfjum. Hinum, Fab Morvan, hefur hins vegar tekist að blása nýjum glæðum í tónlistarferil sinn og hefur meðal annars gefið út sóló­skífu sem fékk afbragðs góða dóma.

Gallenburg er ekki sá eini sem hefur í hyggju að gera kvikmynd um Milli Vanilli því í Hollywood er einnig unnið að gerð kvikmyndar um þennan alræmda dúett.