Eddie Murphy aftur á stóra sviðið

Eddie Murphy verður kynnir á Óskarnum. Sem þýðir að það verður stuð á stóra Kodak-sviðinu þegar gamanleikarinn stígur á stokk vopnaður einu frægasta brosi Hollywood og einstökum hlátri.

Sögusagnirnar um Eddie Murphy í kynnishlutverki Óskarsins fóru á kreik um helgina. Leikstjórinn Brett Ratner, sem stýrir Murphy í gamanmyndinni Tower Heist, var sagður áhugasamur um að fá gamanleikarann til liðs við sig og í gær var verst geymda leyndarmálið í Hollywood opinberað; að Murphy hefði fengið starfið, hann yrði kynnir.

Yngra fólk kann að hrista hausinn yfir þessari ákvörðun og hugsa með sjálfu sér: hvað í ósköpunum hefur Eddie Murphy gert síðastliðin ár til að verðskulda þennan heiður?

Og það er kannski ekki margt, þessi annars eitursnjalli gamanleikari hefur verið sjálfum sér verstur í hlutverkavali, hver b-myndin á fætur annarri hefur bæst á ferilskrána, ef undanskilið er aukahlutverkið í Dreamgirls. Hláturgasið, sem Murphy hafði ótæmandi aðgang að á síðustu öld, hefur ekki hrifið áhorfendur í kvikmyndum á borð við Meet Dave, Imagine That, Norbit, The Haunted Mansion eða I Spy (að meðaltali hafa þessar myndir fengið undir fimm í einkunn á hinni mjög svo jákvæðu kvikmyndavefsíðu imdb.com.).

En Murphy er fleira til lista lagt en að leika í vondum myndum því þeir sem hafa séð heimildarmyndina Eddie Murphy Raw frá árinu 1987 vita að fáir eru betri á sviði en hann. Murphy var hluti af Saturday Night Live-hópnum í fjögur ár og var stjarna hópsins. Hann hafði einstakt nef fyrir tímasetningum og var undir sterkum áhrifum frá Richard Pryor, hann þótti stundum ófyrirleitinn, grófur og jafnvel dónalegur en alltaf fyndinn. Og á níunda áratug síðustu aldar fór hann á kostum í hverri myndinni á fætur annarri; Beverly Hills Cop, 48 Hours, Coming to America og Trading Places.

Og þetta veit leikstjórinn Ratner og veðjar þess vegna á Murphy. „Eddie er grínsnillingur, hann er einn besti uppistandari allra tíma og hefur haft mikil áhrif á þá list. Ást hans á kvikmyndum og einstakur hæfileiki til að töfra fram ógleymanlegar persónur eiga eftir að gera Óskarskvöldstundina að ógleymanlegri stund," segir í yfirlýsingu frá Ratner.

freyrgigja@frettabladid.is