Vingaðist við hjákonuna

Kelly Osbourne vingaðist við hjákonu fyrrverandi unnusta síns. Hjákonan er kynskiptingur. Sjónvarpsstjarnan Kelly Osbourne hætti sem kunnugt er orðið með unnusta sínum, fyrirsætunni Luke Worrall, eftir að upp komst um framhjáhald hans. Tímaritið Us Weekly birti nýverið viðtal við hjákonuna sem er ungur kynskiptingur að nafni Elle Schneider. Schneider segist hafa kynnst Worrall á skemmtistað í New York og að þau hafi eytt einni kvöldstund saman á hótelinu Four Seasons. Schneider segist ekki hafa vitað af því þá að Worrall væri trúlofaður Osbourne. „Hann sagði mér að hann væri á lausu. Ég var hreinskilin við hann og sagði honum frá því að ég væri á leið í kynskiptiaðgerð og hann virtist ekkert kippa sér upp við það.“ Að sögn Schneider heyrði hún ekki aftur frá Worrall fyrr en nokkrum mánuðum síðar og fóru þá öll þeirra samskipti fram á netinu fyrir utan eina helgi sem þau eyddu saman í London. „Ég komst að því síðar að hann var að reyna að ná Kelly aftur á þessum tíma. Hún komst svo yfir tölvusamskipti okkar og hafði í kjölfarið samband við mig. Hún sagði mér frá ástarsorg sinni og ég hlustaði. Við töluðum mikið saman eftir þetta og ég passaði mig á því að vera aldrei kvikindisleg og efaðist aldrei um það sem hún sagði mér í samtölum okkar. Við erum enn góðar vinkonur,“ sagði Schneider í samtali við blaðið.