Heillaður af tónlist

Josh Homme, forsprakki Queens of the Stone Age, hefur staðfest að hljómsveitin sé byrjuð að undir­búa nýja plötu, tæpum fjórum árum eftir að sú síðasta, Era Vulgaris, kom út. „Ég er byrjaður að spila aftur bara til að spila aftur og er aftur orðinn heillaður af tónlistinni. Það er langt síðan ég gat síðast spilað án þess að vera undir einhvers konar þrýstingi,“ sagði Homme.

„Hvað mig snertir verð ég að vera hugfanginn af tónlistinni. Stundum verður að taka sér smá frí til að átta sig á því.“ Homme býst við því að aðdáendur Queens of the Stone Age geti heyrt nýtt efni með sveitinni á þessu ári en tekur fram að allt slíkt taki sinn tíma. Næst á dagskrá hjá hljómsveitinni er tónleikaferð um Nýja-Sjáland og Ástralíu í febrúar og mars þar sem hún ætlar að spila sína fyrstu plötu í heild sinni.