Deep Jimi númer 60 þúsund

Rokksveitin Deep Jimi and the Zep Creams varð þess heiðurs aðnjótandi að eiga sextíu þúsundasta lagið sem var skráð hjá STEFi, Sambandi tónskálda og textahöfunda, en það er lagið Nothing Can Go Wrong. Af því tilefni var rokkurunum boðið í heimsókn í húsakynni STEFs í gær þar sem móttökuathöfn var haldin.

„Hérna eru sextíu þúsund verk á skrá og yfir sex þúsund höfundar, sem þýðir að hver höfundur semur að meðaltali tíu lög," segir Jenný Davíðsdóttir, skrifstofustjóri STEFs. Sambandið sér um að skrá hjá sér ný lög tónlistarmanna og sér í framhaldinu til þess að þeir fái borgað fyrir opinberan flutning þeirra.

Jenný segir það eiga mjög vel við hjá STEFi að Nothing Can Go Wrong hafi orðið númer sextíu þúsund í röðinni, enda leggur sambandið áherslu á að ekkert fari úrskeiðis í starfsemi sinni.

Fyrsta lagið sem var skráð hjá sambandinu var Ave María eftir Sigvalda Kaldalóns árið 1948. Síðan þá hafa lögin hrúgast inn og árið 2006 datt fimmtíu þúsundasta lagið í hús. Frá því í september 2001 hafa þrjátíu þúsund lög verið skráð hjá STEFi, sem er jafnmikið og var skráð hjá sambandinu fyrstu fimmtíu árin.- fb