Nemendasýningar menntaskólanna að taka á sig mynd

Leiksýningar menntaskólanna hafa notið mikilla vinsælda um langt skeið og er nú farið að skýrast hvaða sýningar verða settar upp í vinsælustu menntaskólunum.

Fréttablaðið greindi frá því í síðustu viku að Verzlunarskóli Íslands og Menntaskólinn í Reykjavík setja báðir upp leiksýningar sem byggja á leikverki Shakespeares um Draum á Jónsmessunótt.

MR frumsýnir sjálft leikverkið hinn 25. febrúar í húsi Norðurpólsins og verður leikstjórn í höndum Gunnars Helgasonar en Verzlunarskólinn setur upp söngleikinn Drauminn í Loftkastalanum og verður frumsýnt hinn 3. febrúar. Leikstjóri Verzlinga er leikarinn Orri Huginn Ágústsson, danshöfundur er Stella Rósenkranz og tónlistarstjórn er í höndum strákanna í StopWaitGo, en þeir hafa verið að gera það gott í tónlistargeiranum hér á landi.

Kvennaskólinn í Reykjavík setur upp Vorið vaknar eftir Frank Wadekind, en það er Kári Viðarsson sem leikstýrir Kvenskælingum og verður verkið sýnt í skólanum sjálfum. Leikfélag Menntaskólans við Sund setur upp söngleikinn Hairspray, en handritið er byggt á kvikmynd John Waters frá 1988. Hairspray verður frumsýnt í Austurbæ 15. febrúar, en leikstjóri er leikarinn góðkunni Pétur Einarsson og danshöfundur er Örn Guðmundsson.

Leikfélag Menntaskólans við Hamrahlíð vinnur að spunasýningu sem nemendur semja sjálfir, en sýningin hefur ekki enn hlotið nafn. Leikstjóri MH-inga er Bjartmar Þórðarson en verkið verður sýnt í Hamrahlíðinni. Samkvæmt heimildum Fréttablaðsins vinnur Fjölbrautaskólinn í Garðabæ að söngleiknum Lyngmóar 3, en ekki fengust nánari upplýsingar um verkið.

kristjana@frettabladid.is