Sannleikurinn sagna bestur

Leikarinn Ashton Kutcher vill að sannleikurinn fái að njóta sín í meira mæli í fjölmiðlum. Hann hvetur fólk til að hætta að dreifa slúðri sem er ekki sannleikanum samkvæmt.

Leikarinn Ashton Kutcher hefur beðið fjölmiðla um að hafa sannleikann í hávegum í nýju myndbandi sem hann birti á Twitter-síðu sinni. Þar segist Kutcher, sem hefur verið sakaður um að halda framhjá eiginkonu sinni Demi Moore, vonast til að ummæli sín muni leiða til meiri umræðu um sannleika í fjölmiðlum.

Leikarinn tók nýlega við hlutverki Charlie Sheen í hinum vinsælu gamanþáttum Two and a Half Men. Hann telur að samskiptasíður á netinu hafi orðið til þess að slúðurfréttum af fræga fólkinu, sem margar hverjar séu skrifaðar af illum hug, hafi fjölgað. „Við erum okkar eigin ritstjórar, útgefendur og prentmiðlar. Þess vegna getur fólk afbakað sannleikann á hvaða hátt sem því hentar og dreift honum út um allan heim. Ein lygi getur ferðast um hálfan hnöttinn áður en nokkur getur sagt sannleikann.“

Hann leggur til að nota skuli fjölmiðla, þar á meðal samskiptasíðurnar, til að auka þekkingu fólks, frekar en að dreifa röngum upplýsingum um aðra. „Efnið sem við búum til fyrir fjölmiðlana og deilum með öðrum þarf að vera búið til á heiðarlegri hátt.“

Kutcher tjáði sig ekkert um ásakanirnar um að hann hafi haldið framhjá með hinni 23 ára Sara Leal. Því hefur verið haldið fram að þau hafi eytt nótt saman 24. september, á brúðkaupsafmæli Kutchers og Moore. Orðrómur um skilnað þeirra fékk byr undir báða vængi á dögunum þegar flutningabíl var lagt fyrir utan heimili þeirra í Santa Monica í Kaliforníu. Kutcher hefur áður hvatt fólk á Twitter-síðunni til að trúa því ekki sem skrifað hefur verið um samband þeirra hjóna.