Harðjaxl hættir við Expendables 2

Mickey Rourke hefur dregið sig út úr The Expendables 2 og mun því ekki endurtaka leikinn sem húðflúrkappinn Tool. Samkvæmt vefsíðunni Deadline.com þótti leikaranum launin ekki nægilega há. Hann hefur því hafið samningaviðræður við leikstjórann Martin McDonagh um að leika í myndinni Seven Psychopaths.

Undirbúningur fyrir The Expendables 2 er nú í fullum gangi og hver harðhausinn af fætur öðrum rekur þar inn nefið. Sylvester Stallone leikstýrði fyrstu myndinni en það verður Simon West sem situr í leikstjórastólnum að þessu sinni, eflaust til að gera Stallone það kleift að einbeita sér enn frekar að leiknum, en Bruce Willis og Arnold Schwarzenegger verða í töluvert stórum rullum í þessari mynd.

Seven Psychopaths lítur hins vegar einnig vel út á pappírunum en Rourke yrði í góðum hópi með þeim Colin Farrell, Sam Rockwell og Christopher Walken. Myndin segir frá handritshöfundi sem glímir við ritstíflu en fær innblástur þegar hann tekur þátt í því að ræna hundi glæpaforingja.