Anita Briem gistir í húsi Louisu Matthíasdóttur

Anita Briem undirbýr sig nú af kappi fyrir hlutverk sitt í kvikmyndinni Kill The Poet sem sjónvarpsmógúllinn fyrrverandi Jón Óttar Ragnarsson leikstýrir. Anita leikur listakonuna Louisu Matthíasdóttur og hefur leikkonan áður lýst því yfir að það hafi verið mikill heiður fyrir sig að hreppa hlutverkið.

Hún ákvað því að vera viðstödd opnun sýningar á verkum Louisu í Tibor de Nagy galleríinu sem fram fór á fimmtudagskvöld. Þar að auki gistir hún í húsi listakonunnar við 16. götu í New York og hyggst eyða tíma með Temmu, dóttur Louisu, og fjölskyldu hennar. Meðal annarra leikara í Kill The Poet má nefna Nick Stahl, sem leikur Stein Steinarr, Gísla Örn Garðarsson og Ed Asner. - fgg