Kári vill Klambratúnið undir stórtónleika

„Ég er einfaldlega að kanna hug Reykjavíkurborgar, hvort það sé mögulegt að nota túnið undir selda viðburði," segir Kári Sturluson, umboðsmaður og tónleikahaldari.

Menningar-og ferðamálaráð Reykjavíkurborgar tók fyrir erindi Kára á fundi sínum á mánudag um afnot af Klambratúni sumarið 2012 vegna tónlistarviðburðar sem rukkað yrði inn á. Ráðið fól forstöðumanni Höfuðborgarstofu að afla frekari upplýsinga um viðburðinn áður en afstaða væri tekin til málsins. Kári segist á hinn bóginn ekki vera með neinn ákveðinn viðburð í huga, hann vilji miklu frekar hafa vaðið fyrir neðan sig áður en hann fari að bóka einhverjar hljómsveitir. „Það er miklu skynsamlegra heldur en að fá til sín hljómsveit og leita svo að tónleikastaðnum og lenda kannski í tómum vandræðum."

Sif Gunnarsdóttir, forstöðumaður Höfuðborgarstofu, segir í samtali við Fréttablaðið að engin lög séu til um hvort eða hvort ekki megi rukka inn á tónleika í almenningsgörðum Reykjavíkurborgar. Það hafi hins vegar aldrei verið gert. Í umsögn Sifjar sem lögð var fyrir menningar-og ferðamálaráðið kemur fram að viðburðurinn eigi að standa yfir í einn til tvo daga um helgi frá klukkan tvö til miðnættis. Sif bendir á í umsögn sinni að Klambratúnið standi í miðju íbúðarhverfi þannig að tveggja daga viðburður með rafmagnaðri tónlist í tíu klukkutíma hvorn daginn gæti komið illa við íbúa. - fgg