Hélt að pabbi myndi myrða mömmu

Bandaríska söngkonan Nicki Minaj var stödd í London nú í vikunni og á meðan á heimsókninni stóð veitti hún dagblaðinu The Sun viðtal. Þar kemur meðal annars fram að faðir hennar hafi verið mjög ofbeldisfullur og lifði Minaj í stöðugum ótta.

Faðir Minaj var eiturlyfjafíkill sem var sjaldan til staðar fyrir söngkonuna sem barn. Hún segir hann jafnframt hafa verið mjög ofbeldisfullan og beitt móður hennar miklu ofbeldi.

„Öll barnæska mín var lituð af því að ég var stöðugt hrædd um að faðir minn mundi einn daginn myrða móður mína. Þetta voru mjög erfiðir tímar og mér þótti hart að eiga foreldri sem var á valdi fíkniefna og áfengis. Faðir minn var mjög ofbeldisfullur,

bæði andlega og líkamlega," sagði söngkonan. Hún sagði ofbeldið hafa hætt þegar eldri bróðir hennar komst til manns og hélt verndarhendi yfir henni og móður hennar.