Góð tilfinning að horfa á eftir Frusciante

Liðsmenn Red Hot Chili Peppers eru farnir að gera upp brotthvarf gítarleikarans Johns Frusciante. Niðurstaðan er sú að á endanum hafi það verið góð tilfinning að fá nýjan mann í bandið.

Hljómsveitin sendi frá sér tíundu hljóðversplötu sína, I‘m With You, fyrr á árinu. þar sem nýi gítarleikarinn, Josh Klinghoffer, birtist aðdáendum sveitarinnar í fyrsta skipti. Söngvarinn Anthony Kiedis ræddi brotthvarf Frusciante við Daily Mirror: „Tilfinningin var góð því við vissum að hann yrði ánægðari ef hann gerði eitthvað annað. Við höfðum náð svo miklu fram með John og við verðum alltaf stoltir af því.“

Kiedis segir enn fremur að tilkoma Klinghoffers hafi fært sveitinni nýjan kraft. „Josh kom inn með sjálfstraust. Innan tveggja vikna var hann farinn að sýna okkur hugmyndir sínar, sem okkur fannst mjög fallegar. Við sáum að við gátum byggt á þeim.“ Söngvarinn segir að sveitin hafi tekið upp mikið efni fyrir nýju plötuna: „Við tókum upp um 50 lög. Við kláruðum ekki öll og við þurftum að velja úr þeim en þetta bara vatt upp á sig. Þetta var svo skemmtilegur tími.“

Nýja platan hefur fengið heldur misjafna gagnrýni. Á Metacritic.com, þar sem tekin er saman gagnrýni stóru miðlanna, er platan með 6,3 í einkunn af 10 mögulegum. Aðdáendur Red Hot geta þó huggað sig við að liðsmenn sveitarinnar gerðu ekki tvöfalda plötu eins og síðast.