Samdi lag fyrir 100 milljónir

„Þetta er í rauninni stærra en að spila á Wembley, þannig séð," segir tónlistarmaðurinn Birgir Hilmarsson. Lag hans hljómaði í nýrri auglýsingu farsíma­fyrirtækisins Motorola sem var sýnd í hálfleik Super Bowl fótboltaleiksins í Bandaríkjunum um síðustu helgi. Talið er að um 105 milljónir áhorfenda hafi séð auglýsinguna.

Birgir, sem er einnig liðsmaður hljómsveitarinnar Ampop, fékk verkefnið í gegnum umboðsmann sinn sem starfar hjá tónlistar­fyrirtæki í New York. „Ég held að fjöldinn allur af tónskáldum hafi verið að keppast um þetta. Ég datt í lukkupottinn í þetta skiptið," segir Birgir, sem hefur verið búsettur í London undanfarin ár. „Þetta var rosa rússíbanareið. Ég gerði upphaf­lega tvö verk fyrir þessa auglýsingu en ákvað þá að velja aðra pælingu sem er mínimal­ískt píanóverk. Ég lagði rosapúður í það en þá fékk ég allt í einu símtal um að Motorola vildi það ekki," segir Birgir. Þá ákvað hann að nota útgáfu sem hann átti af lagi sem kom út á plötunni Cinematic Songs sem kom út á netinu í fyrra og það hitti í mark hjá Motorola.

Birgir hefur fengið mikla athygli á Youtube fyrir lagið sitt og komst það í 10. sæti í Bretlandi yfir þau vinsælustu á síðunni í gær. Hann á þó enn eftir að fá borgað frá Motorola. „Það eru enn samningaviðræður í gangi. Ég er með mína umboðsmenn í því."

Hægt er að horfa á auglýsinguna hér fyrir ofan. Einnig á heimsíðu Birgirs, biggihilmars.com. - fb