Capello ósáttur við Mourinho

Fabio Capello segir að Jose Mourinho hafi vanvirt sig með yfirlýsingum sínum um enska landsliðsþjálfarastarfið í gær.

Mourinho sagði þá að hann hafi aðeins verið nokkrum klukkustundum frá því að taka að sér starf landsliðsþjálfara eftir að Steve McClaren var rekinn úr starfinu árið 2007.

Á endanum var Capello ráðinn og er hann enn við störf í dag.

„Ég ræði ekki um mín samskipti við önnur félög,“ sagði Capello við enska fjölmiðla. „Ég ber virðingu fyrir öðrum knattspyrnustjórum. Þetta eru mín leyndarmál og mun ég aldrei greina frá því hvað hefur í raun gerst á mínum ferli.“

„Mér finnst þetta alvarlegt mál. Þegar félög eða landslið ráða sér þjálfara er alltaf talað við marga aðila. Það er eðlilegt.“

„Þetta er spurning sem stjórnarformaðurinn þarf að svara. Þetta er ekki spurning sem ætti að beina til mín. Ég hef tjáð mig nóg um þetta. Þakka ykkur fyrir.“

Fulltrúar enska knattspyrnusambandsins hafa einnig tjáð sig um þetta mál. „Fabio var okkar fyrsti kostur þegar kom að því að ráða landsliðsþjálfara,“ sagði talsmaður sambandsins. „Það hefur alltaf legið fyrir frá fyrsta degi.“

Enskir blaðamenn hafa einnig gagnrýnt hversu slæm tök Capello virðist hafa á enskri tungu og að hann geti ekki svarað öllum spurningum sem eru bornar á borð fyrir hann.

„Hvað talar þú mörg tungumál?“ spurði Capello þegar þetta mál kom upp á blaðamannafundi. „Þegar ég er að tala við leikmenn þá skilja þeir allt sem ég segi. Það er það sem er mikilvægt í þessu starfi.“

„Ég get ekki tjáð mig um efnahagsmál eða aðra slíka hluti. En þegar maður er að tala um leikskipulag þarf maður ekki að nota mörg orð. Ég þarf ekki að ræða um marga mismunandi hluti og þarf mest að kunna 100 orð.“