Hin Eurovision lögin nutu ekki sannmælis

Það vakti nokkra athygli á laugardagskvöldið þegar tilkynnt var í Söngvakeppni Sjónvarpsins að þrjú lög kæmust áfram í undankeppninni. Hingað til hafa aðeins tvö lög verið kosin í gegnum símakosningu til að keppa um að verða framlag Íslands til Eurovision.

Ákvörðunin vakti nokkuð hörð viðbrögð og á Facebook-síðu Arnars Eggert Thoroddsen, tónlistarmógúls, skrifaði Friðrik Ómar, margreyndur Eurovision-fari, að þetta væri dæmigert. „Fáranlegt. Lýsir stjórnleysinu sem þarna ríkir. Dæmigert af RÚV að breyta reglum í miðri keppni.“

Sigrún Stefánsdóttir, dagskrárstjóri RÚV, sagði þetta ekki hafa átt sér langan aðdraganda en eftir smá yfirlegu hefði yfirstjórn RÚV komist að þessari niðurstöðu. „Ákvörðunin var tekin í ljósi þessara sérstöku aðstæðna sem þarna sköpuðust við fráfall Sigurjóns Brink.“ Sigrún segir að í kjölfarið hafi komið upp undarleg staða þar sem mikið hafi verið fjallað um hans lag en önnur lög staðið í skugganum. Þau hafi því ekki notið sannmælis í umfjöllun og því hafi þessi ákvörðun verið tekin. -fgg