Henti hákarli í gegnum glugga

Tony Iommi, gítarleikari hinnar goðsagnarkenndu þungarokkhljómsveitar Black Sabbath, hefur gefið út æviminningar sínar.

Í bókinni kennir ýmissa grasa en helsta fréttaefnið er eins og gefur að skilja vinátta hans og söngvarans Ozzy Osbourne. Hann lýsir því hvernig dópið hætti að vera nóg á sínum tíma, þegar þeir félagar voru búnir að djamma of mikið. „Þegar maður er dópaður fer manni alltaf að leiðast,“ segir í bókinni. „Þannig að við gerðum alltaf eitthvað hvor við annan, ég og Ozzy. Hann henti einu sinni hákarli í gegnum glugga á herbergi sem ég var í. Hákarlinn fór í tætlur og það var blóð úti um allt.“

Iommi talar einnig um hvernig dópið og rokkið hafði áhrif á flest sem snerti líf hans. „Við lentum í vandræðum með umboðsfólk, ég kvæntist fjórum sinnum og mér hætti að líða vel þannig að ég hætti án þess að fara í meðferð.“

Iommi lifir góðu lífi í dag og talar ennþá einstaka sinnum við Ozzy. „Ég tala við hann nokkrum sinnum í viku. Ég elska hann, þótt hann geti aðeins haldið athygli í þrjár sekúndur.“