Bylgjubann Jóhanns G. er ólöglegt

Tónlistarmaðurinn Jóhann G. Jóhannsson hefur engar lagalegar heimildir fyrir því að banna lögin sín á Bylgunni að mati STEFs, Sambands tónskálda og textahöfunda.

„Þrátt fyrir samninga sem STEF gerir við útvarpsstöðvarnar sem heimila þeim að flytja tónlist þá geta einstakir höfundar bannað að tónlist þeirra sé flutt í útvarpi,“ segir Eiríkur Tómasson, framkvæmdastjóri STEFs. „Við höfum skýrt þetta ákvæði svo að menn gætu lagt bann við flutningi einstakra verka eða allra verka sinna en þá verður það að ganga yfir allar útvarpsstöðvarnar.“

Samkvæmt lögum þurfa útvarpsstöðvar að hafa minnst mánaðar­fyrirvara til að bregðast við beiðni frá STEFi um að lög listamanns verði ekki spiluð. Jóhann ákvað að fara ekki með málið í gegnum STEF og gaf Bylgjunni átta daga frest til að hætta að spila lögin hans, eða til 22. febrúar.

Jóhann bar fyrir sig sæmdarrétti höfunda í viðtali við Fréttablaðið. Eiríkur segir hann ekki eiga við í þessu tilfelli. „Þótt einum höfundi finnist brotinn á sér sæmdarréttur af því að hann fellir sig ekki við tónlistarstefnu útvarpsstöðvarinnar nægir það ekki til að um sé að ræða brot á sæmdarrétti,“ segir Eiríkur, sem vonast til að málið leysist farsællega enda hafi þeir Jóhann átt góð samskipti í gegnum tíðina.

Þrátt fyrir að lagabókstafurinn sé ekki með Jóhanni treystir hann því að Bylgjan virði eignarrétt sinn. „Þetta breytir engu fyrir þá nema þeir losna við þessa tónlist sem hlýtur að vera jákvætt mál fyrir núverandi tónlistarstjóra Bylgjunnar þar sem hann hunsar allt sem frá mér kemur. Ég er búinn að koma 52 lögum á framfæri á heilu ári og það fær ekki spilun út af persónulegri óvild og engu öðru,“ segir hann.

- fb