Frönsk ofurpía bjargar París

Allt er á öðrum endanum í París árið 1912. 136 milljóna gamalt flugeðluegg hefur klakist út á hillu í náttúrugripasafninu Jardin des Plantes. Risaeðla er komin á ról og borgarbúar eru skelfingu lostnir. Hin unga og skelegga fréttakona Adèle er þó hvergi bangin og lendir í alls kyns óvæntum ævintýrum.

Svona hljómar söguþráður nýjustu myndar leikstjórans Luc Besson, Ævintýri Adèle Blanc-Sec. Hún byggir á vinsælum teiknimyndum eftir Jacques Tardi. Hægt er að horfa á sýnishornið úr myndinni hér að ofan.

Myndin er meðal þeirra sem sýndar eru á Franskri kvikmyndahátið, sem er hafin í Háskólabíói og stendur yfir til 3. febrúar. Hátíðin heldur svo áfram í Borgarbíói á Akureyri 12. til 16. febrúar.

Á meðal annarra áhugaverðra mynda á kvikmynda­hátíðinni er opnunarmyndin Bara hús­móðir með Catherine Deneuve og Gérard Depardieu í aðalhlutverkum og hin hrífandi Velkomin sem sló í gegn í Frakklandi árið 2009. - fb