Fjórir Íslendingar í vinnu á tökustað Karlar sem hata konur

„Ég skrifaði undir trúnaðarsamkomulag um að gefa ekkert upp um efni myndarinnar en ég get alveg viðurkennt að ég hafi verið að vinna í henni,“ segir Finnur Þór Guðjónsson.

Hann er einn af fjórum Íslendingum sem eru í tökuliði bandarísku stórmyndarinnar The Girl with the Dragon Tattoo eða Karlar sem hata konur en hún er byggð á samnefndri skáldsögu Stiegs Larsson um Lisbeth Salander og Mikael Blomkvist.

Finnur Þór vildi lítið tjá sig um starf sitt, sagðist hafa verið ljósamaður og að hann hefði verið í tíu vikur úti í Svíþjóð. Annar Íslendingur var einnig við störf í ljósadeildinni en hann heitir Ævar Sigurðsson og þá ku stúlka hafa verið við störf í búningadeildinni. Fréttablaðið hefur ekki fengið nafn hennar staðfest.

Eins og Fréttablaðið hefur þegar greint frá hefur ljósmyndarinn Baldur Bragason unnið við tökur á myndinni. Hún er ein stærsta kvikmyndaframleiðsla sem Svíar hafa lagt í. Leikstjóri myndarinnar, David Fincher, hefur nú þegar hrist upp í milljónum aðdáenda Stiegs Larsson með þeirri yfirlýsingu að endinum hafi verið breytt. Hann sé allt öðruvísi en endir bókarinnar. Hins vegar hefur ekki fengist staðfest hvort enskumælandi leikarar myndarinnar muni tala með sænskum hreim eins og einhverjar fréttir bentu til.

Með hlutverk tölvuhakkarans Salanders fer Rooney Mara og Daniel Craig leikur blaðamanninn Mikael Blomkvist. -fgg