Eigur Jacksons til sölu

Eigur úr dánarbúi Michaels Jackson voru boðnar upp um liðna helgi og fyrir 540 hluti fengust nærri 200 milljónir króna. Meðal þess sem boðið var upp var spegill með handskrifuðum miða áföstum, en á miðann hafði poppgoðið skrifað nokkur orð um tónleikaröðina sem hann hafði fyrirhugaða.

Krítartafla úr eldhúsinu var líklega sá hlutur sem seldist fyrir hæsta verðið miðað við verðgildi, en hún seldist fyrir rúmar 600.000 krónur. Ástæðan er sú að á hana hafði ellefu ára dóttir Jacksons, Paris, skrifað: „Elsku pabbi / Ég (hjarta) pabbi / Brostu – það kostar ekkert.“