Eins og fugl í útrýmingarhættu

„Hann er afar sjaldgæf mannvera, eins og fugl í útrýmingarhættu,“ segir Frosti Gringo sem frumsýnir í kvöld heimildar­­myndina Enginn meðaljón, sem fjallar um Jón Sveinsson, bæjarstarfsmann í Garðabæ. „Hann er hálfgerð goðsögn í Garðabænum. Hann hefur unnið fyrir bæinn frá því ég var lítill. Hann tínir rusl, en er ekki ruslakarl. Hann labbar um bæinn og hreinsar hann upp,“ útskýrir Frosti, sem lýkur brátt námi sínu við Kvikmyndaskóla Íslands. „Maður tók alltaf eftir því hvað hann var jákvæður og brosmildur, til í að tala við alla og lúmskur heimspekingur, þannig að mig langaði að gera um hann mynd.“ Frosti segir að Jón hafi komið sér á óvart á marga vegu þegar hann byrjaði að taka upp myndina. „Hann er rosalega samúðarfullur og skilningsríkur gagnvart fólki og dýrum. Hann æfði línudans í sex ár og kann best við sig í kúrekafötum. Hann kallar þau sparifötin,“ segir hann. „Þessi mynd er skólaverkefni og ég hafði bara tvo daga til að eyða með honum. Þrátt fyrir það náði ég að gera fína hálftíma mynd úr því.“ Frosti hefur hug á að vinna meira með Jóni og gera um hann heimildarmynd í fullri lengd. Fyrst ætla þeir félagar saman á frumsýninguna í kvöld, sem verður í Bíói Paradís klukkan 20 og er hluti af stuttmyndahátíðinni Reykjavík Shorts & Docs. - fb