Steven Tyler svaf hjá karlmanni

Steven Tyler, söngvari Aerosmith og dómari í American Idol, segist einu sinni hafa átt kynmök við annan karlmann en hann hafi ekki viljað prófa það aftur.

„Ég fíla ekki kynlíf með karlmönnum. Ég prófaði það einu sinni þegar ég var yngri en fékk ekki mikið út úr því," skrifaði hann í nýrri ævisögu sinni Does the Noise In My Head Bother You? sem er nýkomin út. Þar lætur hann ýmislegt flakka um litríkan feril sinn sem rokksöngvara í fremstu röð.

Hann krafðist þess ávallt að „hreinar stelpur" biðu hans í sturtunni eftir tónleika. „Þrátt fyrir að hugur minn sé sóðalegur skiptir líkamlegt hreinlæti mig máli. Kelly [aðstoðarkona Aerosmith] sá alltaf til þess að stelpurnar væru í sturtunni þegar ég kom inn í herbergið. Ég vildi ómengaða fegurð. Ég get ekki kysst stelpu sem hefur verið að stökkva fram af sviðinu með fimm hundruð öðrum karlmönnum," skrifaði hann.

Í bókinni segir hann einnig frá einelti sem hann varð fyrir í æsku og að hann hafi aldrei átt í ástarsambandi við konu sem hafi treyst honum fullkomlega.

Steven Tyler er einnig nýbúinn að gefa út smáskífu við lagið (It) Feels So Good. Myndbandið má sjá hér fyrir ofan.