Safnari fær loksins áritun á Lífsjátningu Guðmundu

„Þetta er stórmerk kona. Hún náði langt og söng fyrir Bandaríkjaforseta á lóð Hvíta hússins í den,“ segir hljómplötusafnarinn Ólafur Sigurðsson.

Ólafur heimsótti söngkonuna Guðmundu Elíasdóttur á dögunum og fékk hjá henni áritun á plötuna Lífsjátning, sem kom út samhliða samnefndri bók Ingólfs Margeirssonar árið 1981. Hann var að hitta Guðmundu í fyrsta skipti og segir hana vera afar hressa og skemmtilega. Ólafur segir plötuna nokkuð sjaldgjæfa, en að útgáfuferill Guðmundu sé að öðru leyti mjög óljós. „Það var eitthvað tekið upp í Noregi með henni, en hún vissi ekki hvað varð um það. Hún var þekkt á Norðurlöndunum,“ segir hann. „Hún lofaði alveg ofboðslega góðu og var farin að syngja og öðlast frægð, en þá missir hún röddina. Þetta var alveg ægilegt áfall. Hún kom svo heim og fór að kenna söng.“

Ólafur er í hljómplötuklúbbn­um Íslensk tónlist, en þar koma saman helstu hljómplötusafnarar landsins. Sjálfur safnar hann árituðum plötum og var heimsóknin til Guðmundu því kærkomin. „Ég á líka Hljóma, Hauk Morthens og ég veit ekki hvað og hvað. Þetta er bara sérviska. Safnaradella,“ segir hann hress.

Hann segir hljómplötuklúbbinn hittast nokkrum sinnum á ári, en meðlimirnir vinna að því að skrá allar vínylplötur sem hafa verið gefnar út á íslensku. „Við erum að vinna í því – þetta er tónlistarsagan,“ segir hann. „Það eru komnar allar 78 snúninga hljómplöturnar, ásamt öllum frá SG og Tónaútgáfunni. Svo er ýmislegt eftir.“

Sjálfur á Ólafur safn af 78 snúninga plötum sem var áður í eigu Karls Strand sem bjó í London á stríðsárunum. „Þessar plötur voru lánaðar í undergroundið þegar sprengjum rigndi yfir London. Pældu í því. Þá voru þeir að hlusta á MA-kvartettinn,“ segir Ólafur og hlær. „Svo hitti ég Breta á Íslandi sem heitir Michael Strand og ég spyr hvort hann sé skyldur Karli Strand. Þá var það afi hans. Skrýtin tilviljun. Þá sagði hann mér að afi sinn hefði alltaf verið að spila einhverja leiðinlega músík. En það var gaman að ég datt niður á þetta safn.“atlifannar@frettabladid.is