Ný kvikmyndaverðlaun

Kvikmyndaverðlaun tímaritsins Myndir mánaðarins og síðunnar Kvikmyndir.is verða haldin í Sambíóunum Egilshöll í fyrsta sinn á morgun. „Það þarf að hafa einhver verðlaun þar sem fólk fær að segja sína skoðun.

Edduverðlaunin eru frábær en það eru fagverðlaun. Það er allt öðruvísi sýn sem kemur þar fram," segir Erlingur Grétar Einarsson, sem verður kynnir kvöldsins ásamt Tómasi Valgeirssyni. „Stefnan er að halda þetta árlega. Allir sem koma nálægt þessu eru rosa hrifnir af þessu konsepti."

Fjölbreyttur hópur tók þátt í forvali verðlaunanna, bæði kvikmyndaáhugamenn og fólk úr bransanum. Eftir það völdu lesendur Kvikmynda.is sigurvegara úr fimm tilnefningum í hverjum flokki og eru flokkarnir sextán talsins, þar af fjórir íslenskir.

Erlingur Grétar hefur lengi fylgst með erlendum kvikmyndahátíðum og hlakkar til að feta í fótspor kynna á borð við Ricky Gervais og Billy Crystal. „Það er aðalmálið að þetta verði ekki þurrt. Það er dagskipunin að hafa þetta ferskt og skemmtilegt."

Hönnuðir verðlaunagripsins, sem hefur verið kallaður K-ið, eru þeir Þóroddur Bjarnason og Stefán Einarsson. - fb