De Niro á Cannes í vor

Tvöfaldi Óskarsverðlaunahafinn Robert De Niro verður formaður dómnefndar á kvikmyndahátíðinni í Cannes í maí. Hinn 67 ára leikari segir það mikinn heiður að vera formaður á einni elstu og bestu kvikmyndahátíð veraldar. De Niro, sem er annar af stofnendum Tribeca-hátíðarinnar í New York, mun taka þátt í að velja hvaða mynd hlýtur Gullpálmann á þessu ári. Hann hefur átta sinnum komið til Cannes til að kynna myndir sínar. Árið 1976 vann mynd hans Taxi Driver Gullpálmann, rétt eins og The Mission gerði tíu árum síðar.