Langt því frá að vera furðulegasta flúrið

Össur Hafþórsson, annar eigenda húðflúrsstofunnar Reykjavík Ink, segir að húðflúr Þorgeirs Gunnarssonar sé langt því frá að vera það furðulegasta sem hefur verið teiknað á stofunni hans.

Þorgeir er eldheitur aðdáandi Erps Eyvindarsonar og hljómsveitar hans, XXX Rottweiler og lét húðflúra andlit rapparans á innanverðan framhandlegg sinn í gær.

„Furðulegasta tattúið var mynd af leiðbeiningunum um hvar maður á að þvo sér þegar maður fer í sund," segir hann. „Hann fékk útlínurnar af kallinum og rauðu blettina sem sýna hvar maður á að þvo sér. Hann lenti í útistöðum við íslenskan baðvörð og honum fannst þetta svo eftirminnilegt. Og þetta var ekki lítið tattú!"