Þúsund tölvunirðir hertaka Hörpu

„Markmiðið á hverju ári er alltaf að toppa okkur og gera hátíðina stærri og meiri fyrir alla þá sem koma að henni," segir Eldar Ástþórsson, markaðsstjóri CCP.

Talsvert hefur gustað um CCP og samskipti fyrirtækisins við leikmenn í ár eftir að innanhússpósti var lekið á netið þar sem kynntar voru hugmyndir um breytingar á leiknum. Í kjölfarið sögðu margir upp áskrift sinni að leiknum og Eldar viðurkennir að fyrirtækið hafi unnið hörðum höndum að því að vinna það traust aftur. „Og að sjálfsögðu er EVE Fanfest einn liður í þeirri vinnu."

EVE Fanfest hefur verið fastur liður í lífi leikmanna tölvuleiksins vinsæla, hátíðin á næsta ári á að vera sú glæsilegasta í sögunni og af þeim sökum hefur verið ákveðið að halda hana í tónlistar-og ráðstefnuhúsinu Hörpu dagana 22.-24. mars. En hátíðin hefur yfirleitt farið fram í Laugardalshöllinni.

Að sögn Eldars eru menn að leggja línurnar um þessar mundir og hafa uppi háleitar hugmyndir um notkun á húsnæðinu þar sem hin glæsilegi Eldborgarsalur kemur meðal annars við sögu. „Það kemur bara í ljós hvernig við munum útfæra húsið og hvernig það nýtist okkur best."

Þetta verður áttunda árið í röð sem hátíðin verður haldin og hún hefur breyst talsvert. „Þetta byrjaði fyrst sem hálfgert pöbba-rölt en í fyrra slógum við aðsóknarmet, þá mættu yfir þúsund manns. Við ætlum að gera enn betur í ár." -fgg